Latest News

Ku-xigeenka Xoghayaha Guud Ee QM U Qaabilsan Bani-aadanimada Ee Soomaaliya Oo Yimid Somaliland

Hargeysa, (Haatuf) – Ku-Xigeenka Ergeyga Gaarka ah ee
Xoghayaha Guud ee Qaramada Midoobay, ahna Isu-duwaha Hay’adaha Qaramada
Midoobay iyo Isu-duwaha Arrimaha Bani’aadanimo ee Soomaaliya ayaa booqasho ku
yimid Caasimadda Somaliland ee Hargeysa.

Sidaana waxa lagu sheegay War-saxaafadeed ka soo baxay
Xafiiska Qaramada Midoobay ku leedahay Hargeysa, kaasi oo isagoo dhamaystiran u
qornaa sidan “Md. Adam Abdel moula oo ah sarkaal sare oo ka tirsan Qaramada
Midoobay ayaa booqasho ku yimid Somaliland 27kii ilaa 29kii January isagoo
kulano la qaatay xukuumadda kuwaas oo ku saabsan arrimaha bani’aadanimada iyo hadafyada
mudnaanta u ah horumarinta Somaliland.

Wuxuu sidoo kale kulamo la mid ah la qaatay hay’adaha aan
dawliga ahayn iyo kuwa Qaramada Midoobay.

Adam wuxuu ka shaqayn jiray Hargeysa muddadii u dhaxaysay
1999  ilaa 2002, hase ahaatee safarkani
waakiisii ugu horreeyey tan iyo intii dhammaadkii sannadkii hore loo magacaabay
Ku-Xigeenka Ergeyga Gaarka ah ee Xoghayaha Guud ee Qaramada Midoobay ahna
Isu-duwaha Hay’adaha Qaramada Midoobay iyo Isu-duwaha Arrimaha Bani’aadanimo.

Md. Adam Abdel moula madaxda sare ee dawladda ee uu la
kulmay waxa ka mid ahaa Madaxweyne-Xigeenka Somaliland Md. Cabdiraxmaan
Cabdillaahi Ismaaciil “Saylici”. Md. Abdel moula wuxuu hadalkiisa awoodda ku
saaray sidii wax looga qaban lahaa caqabadaha muddada dheer soo taagnaa:
“Waxaynu ognahay in Somaliland iyo deegaanada ku hareeraysan ay saameeyeen
abaaraha soo noqnoqday iyo barakaca bulshadu” ayuu yidhi Adam. Wuxuu intaa
raaciyey “Taasi maaha wax lala yaabi karo, laakiin waxa ka dhashay dhibaatooyin
soo taxnaa ku dhawaad 20kii sanno ee ugu dambeeyey. Waxayna taasi innoo
sheegaysaa in aynu u baahan nahay in aynu la nidaamno qaabab cusub oo aynu
dhibaatooyinkaa wax kaga qabanayno.”

Kadib kulan uu Ku-Xigeenka Ergeyga Gaarka ah ee Xoghayaha
Guud ee Qaramada Midoobay la qaatay Wasiirka Qorshaynta iyo Horumarinta Qaranka
Md. Xasan Maxamed Cali “Gaafaadhi” wuxuu yidhi “Waxaan rajaynayaa in aan
dhakhso u soo noqdo oo aan kulano iyo falanqayn intan ka qoto-dheer la yeesho
Xukuumadda oo aanu ka wada shaqayno arrimaha horumarinta iyadoo aanu hadda ku
gudo jirno diyaarinta Hannaanka Wada-shaqaynta Qaramada Midoobay”.

Intii uu joogay Hargeysa, Md. Abdel moula wuxuu sidoo
kale booqday mashaariic ay wadaan UNHCR, UNFPA iyo IOM..”

Connect with us on Facebook

Leave a comment

Your email address will not be published.


*


Social media & sharing icons powered by UltimatelySocial