Latest News

Mashruucii Sallaanka Qasriga Musbaarbaa Ku Qaloocday: By. Maxamed Suldaan

Dubaha ninka daabkiisa haya ayaa musbaarka adeegsada si
uu loox loox ugu xidho.  Waxa iska cad
baryahan danbe in dadkeenu ay wada noqdeen amba u badan yihiin masaabiir iyo
looxaan loo adeegsado in loogu fushado danta ay leeyahiin siyaasiyiintu. Waayo
sida uu nijaarku u tuuro masaabiirta ka xumaata ayaa dadkana inta ku dhimata
amba dhibaato kasoo gaadho hawl gal siyaiasadeed ay siyaasiyiintu u ilaabaan
markay dantooda gaadhaan; ku darsoo sida looxa uu nijaarku u kala qayb qaybiyo
isagoo adeegsanaya miishaarta ayaa uu siyaasiguna dadka ku kala qayb qaybiyaa
isagoo ku guuraya qabyaalada si uu dantiisa oo kaliya u gaadho.

Waxa se xusid mudan in looxa iyo musaabiirta manfaca
samaynayaa ay dakhli soo galiyaan ninkii lacagta u dhiibay nijaarka si uu usoo
iibiyo alaabta galaysa qandaraaska. Tan waxa la mid ah, inay jiraan dad leh
dano gaara oo lacagta usoo dhiiba siyaasiyiinta si hadii ay xilka ku
guulaystaan ay ugu fuliyaan danaha gaarka ee ay dadkaas lacagta bixiyey
damacsan yihiin. Balse waxa xaqiiq ah inay dadkeenu lacagta arkaan balse aanay
ogayn in loo soo qaatay mashruuc dadka lagaga shaqaysanayo oo kaliya.

Mashruuc amba qandaraas waxa bixiya nin lacag haysta oo
doonaya in dan uu isagu leeyahay loo fuliyo noocay doontaba ha ahaatee. Anigu
waxaan ka shakiyey ganacsatada iyo deeq bixiyayaasha ayaa danta ay leeyihiin
daraadeed ugu deeqa siyaasiyiinta. Marka hesiis lala galo ee lacagta lagu
wareejiyo nijaarka si uu usoo iibiyo alaabta, si uu iskugu qayb-qaybiyo looxa una
cabiro amba iskugu xidho looxa. Adiguba caqligaaga kaashoo la taliyayaasha,
koofiyada baclayaasha, qabqablayaasha ayaa ah dadka uu adeegsado siyaasigu si
uu dantiisa iyo danta dadka ka danbeyaba u fuliyo.

Nijaarku marka uu samaynayo amaba uu ka shaqaynayo
Salaanka lagu korayo qasriga uma naxariisto looxa iyo musaabiirta; uhu horayn
looxa waxa uu ku kala qayb qaybiyaa miishaar halka musaabiirtana uu ugu garaaco
dubaha si aanay dib uga soo bixin looxa. Tan waxa ay la mid tahay marka ay siyaasiyiinta
iyo ganacsatadu dantooda fushanayaan uma aabo yeelayaan waxa ku dhacaya
shicibka iyo wadanka ee waxa kaliya oo ay eegayaan waa inuu  hirgalo qorshahoodu, miishaarta ay dadka u
adeegsadaana waa qabyaalada. Hadii aan kuu sii fasiro laba loox si la isku
xidho waxa la adeegsadaa musbaar isagoo ka dhex baxaya looxa oo aan marnaba
diidi Karin awooda dubaha iyo amarka ninka dubaha dabada haya iyada oo la
hirgalinayo naqshadii uu soo sameeyey siyaasigu taasoo uu lacagtana soo bixiyey
nin dan gaar ah leh oo doonaya inuu kaligii faa’ido.

Sidaa daraadeed dadkeena madaxda inoo ah amba ganacsatada
ayuun baa ku guura dadka maxaysatada ah ee aan awoodin inay wax iska difaacaan
iyagoo loogaga faa’idaysanayo baahida lacageed ee haysa.  Dubaha iyo miishaarta ayaa ah madax-dhaqameedyada
lacagta la siinayo si ay dadka iskugu jabiyaan waayo isagaa dadka midayn kara
amba isku diri kara; lasocoo waxa  dubaha
iyo miishaartaba dabadooda qabtaa waa siyaasiga siduu doonayaanuu ka yeelaa
sidaa daraadeed waxaynu odhan karnaa waa middi laba af leh oo loo adeegsado
hadba dhinicii loo qaado xumaha iyo samahaba.

Waa iga talee maskaxdaadu yey noqon, mid lagula leeyahay, oo lagu furo mirqaaniyo, waxaan marinka dhaafin!!

QORE: By. Maxamed Cabdi Jaamac (M. Suldaan)

Connect with us on Facebook

Leave a comment

Your email address will not be published.


*


Social media & sharing icons powered by UltimatelySocial