Madaxii Qaraxyada Al-shabaab Oo Hawlgal Lagu Qabtay
Marka, May 23, 2022 (Haatufonline) – Ururka 14aad ee guutada 14-ka October ee Ciidanka Xoogga Dalka Soomaaliya ayaa Magaalada Marka ku soo qabteen Madaxii Qaraxyada ururka Al-shabaab, Aweys Mayow Maxamed (Eelaay).
Taliyaha Ururka 14aad ee Guutada 14-ka October ee Ciidanka Xoogga Dalka, Gaashaanle Cabdiraxiin Maxamed Munye ayaa hoggaaminayey hawlgalka lagu soo qabtay Aweys Mayow.
Gaashaanle Cabdiraxiin Maxamed Munye ayaa warbaahinta Somalia u sheegay in hoyga ninkaasi laga soo helay bambada nooca gacanta laga tuuro iyo miinada dhulka lagu aaso ah.
Taliyaha ayaa ninkaasi ku eedeeyay in xilligii gacanta lagu soo dhigayay uu ku howlanaa miino uu doonayay in uu ku aaso magaalada gudaheeda, uuna qorshihiisu ahaa in uu ku gumaado shacabka, sida uu yiri. Baaritaano ay ku sameeyeen hoygiisa ayuu sheegay inay ugu suurtagashay in qaraxyadaasi ay gacanta ku soo dhigaan.
Shabaabka ayaan ka hadlin Sarkaalka la sheegay inuu iyaga ka tirsanaa ee lagu qabtay Magaalada Marka ee Xarunta Gobolka Shabellaha Hoose.