Madaxwayne Cirro oo  sheegay inu mudnaanta siinayo adkaynta amniga iyo dardar galinta aqoonsiga

HARGEYSA 14 April 2026 —

Madaxweynaha Jamhuuriyadda Somaliland, Cabdiraxmaan Maxamed Cabdillaahi (Cirro), ayaa 14 April 2026 khudbaddii sannadlaha ahayd ee Dastuuriga ka hor jeediyey fadhiga wadajirka ah ee Golaha Guurtida iyo Golaha Wakiillada, isagoo farriin cad u diray hay’adaha dawladda, golayaasha, iyo bulshada, in mudnaanta koowaad la saaray amniga, maamul-wanaagga, iyo faylka aqoonsiga.  

Cirro wuxuu xusay in xukuumaddu qaaday tallaabooyin amni oo lagu adkaynayo heeganka, laguna casriyaynayo nidaamka difaaca, isagoo tilmaamay in la dhexgeliyey kumannaan askari oo tababaran, lana bilaabay shaqo la xidhiidha ammaanka casriga ah, isla markaana la diyaariyey qorshe qaran oo amni.  

Dhinaca doorashooyinka iyo dimuqraadiyadda, madaxweynuhu wuxuu ku adkeeyey in dib u dhac ku yimaadda doorashooyinku dhaawacayo sumcadda nidaamka, isla markaana culays saarayo kalsoonida guud.  

Arrimaha dhaqaalaha, Cirro wuxuu sheegay in Somaliland la kulantay culaysyo gobolka ku xeeran iyo kuwa caalami ah, balse uu ku dooday in dhaqdhaqaaqa dekedda Berbera iyo dhoofka xooluhu muujiyeen adkaysi, isla markaana la xoojinayo nidaamka maaliyadda iyo hufnaanta dakhliga.  

Wuxuu si gaar ah u taabtay saamaynta jawiga gobolka ee Badda Cas iyo marinnada ganacsiga, isaga oo tilmaamay in arrimuhu ku xidhiidhaan kharashka shidaalka iyo waxyaabaha la soo dejiyo, taas oo cadaadis ku keentay dakhliga iyo qiimaha maceeshadda.  

Diblomaasiyadda, madaxweynuhu wuxuu ku celiyey in aqoonsigu yahay faylka ugu weyn, isagoo ku tilmaamay albaabka Somaliland u furi  kara helitaan dhaqaale, iskaashi amni, iyo xidhiidh dibadeed oo si rasmi ah u shaqeeya.  

Ugu dambayn, khudbadda Cirro waxay ahayd farriin xukuumaddu ku sheegtay jihayn iyo kala hormarin, iyadoo culayska ugu weyn la saarayo amniga, dhaqaale adkaysi leh, iyo aqoonsi loo raro kaadhka siyaasadda dibadda.