Somaliland oo Soomaaliya ku eedaysay isku day ay khalkhal uga hirgaliso Boorama

Haatufonline, 19 April, 2026 –

Xukuumadda Jamhuuriyadda Somaliland ayaa si adag ugu eedaysay Dowladda Federaalka Soomaaliya farogelin iyo abaabul ay ku sheegtay in lagu doonayo in khalkhal looga hirgeliyo Boorama, taas oo ka dambaysay rabshado sababay dhimasho iyo dhaawac, isla markaana dhaawacaya xasilloonida iyo kala dambaynta dalka.

War-saxaafadeed ka soo baxay Wasaaradda Arrimaha Dibadda Somaliland ayaa lagu sheegay in Muqdisho ku hawlan tahay abaabul iyo faafin warar marin-habaabin ah, si loogu shido xiisad siyaasadeed, looguna kala fogeeyo bulshada. Xukuumaddu waxay caddeysay in farogelin kasta oo ka timaadda Soomaliya aanay Somaliland u oggolaan doonin, ayna tahay arrin lid ku ah madaxbannaanida iyo jiritaanka Jamhuuriyadda Somaliland.

Somaliland waxay tilmaantay in amniga Boorama iyo guud ahaan dalka ay masuul ka yihiin hay’adaha qaranka, isla markaana tallaabo adag laga qaadi doono cid kasta oo ku lug yeelata rabshad, burburin, ama kicin ka dhan ah nabadgelyada. Taliska Booliska Somaliland ayaa isna sheegay in ciidamada amnigu ka hortagi doonaan fal kasta oo rabshado wata, si loo adkeeyo kala dambaynta.

Dhanka kale, Somaliland waxay muujisay in hadallada iyo sheegashooyinka ka imanaya Muqdisho aanay waxba ka beddelaynin xaqa Jamhuuriyadda Somaliland u leedahay in ay arrimaheeda gudaha si madax-bannaan u maamusho, isla markaana ay hay’adaha qaranku diyaar u yihiin in ay fashiliyaan farogelin kasta oo lagu wiiqayo xasilloonida dalka.

Waxa la sugayaa fulinta iyo natiijada ka soo baxda tallaabooyinka amni ee la qaaday, iyo sida loo joojin doono farogelin kasta oo dibadda laga soo maleego.